አቡጊዳ የካቲት 21 ቀን 2002 ዓ.ም

በመርካቶ አዲስ ከተማ ትምህርት ቤት አዳራሽ፣ መድረክ ትላንት ቅዳሜ የካቲት 20 ቀን 2002 ዓ.ም ፣ ታላቅ ሕዝባዊ ስብሰባ አደረገ።

የትምህርት ቤቱ አዳራሽ መያዝ ከሚችለዉ በላይ በሰዉ ተጨናንቆ የነበረ ሲሆን ከአዳራሹ ዉጭ ቁጥሩ እጅግ በርካታ የነበረ ሕዝብ እንደነበረም ከስፍራዉ የደረሰን ዜና ያመለክታል። ሁለት ሺህ ሕዝብ የሚይዘዉ አዳራሽ በመሙላቱና ጊቢዉ ዉስጥም መቆሚያ በመጥፋቱ፣ የትምህርት ቤቱ ዘበኞች የመድረኩን ስብሰባ ለመካፈል የመጡ በርካታ ሌሎች ኢትዮጵያዉያንንም ለመመለስም ተገደዋል።

በስብሰባዉ የተገኘዉ ሕዝብ ብዛት ከጠበቁት በላይ የሆነባቸዉና ሕዝቡ ያቀርብ በነበረዉ አስተያየት የተደነቁት ፣ የመድረኩን ስብሰባ የመሩትና በመርካቶ አካባቢ መድረኩን ወክለዉ ለፓርላማ የሚወዳደሩት፣ ወ/ሮ ላቀች ደገፋ፣ «በቅንጅት ጊዜ የነበረዉን አይነት የሕዝብ ግለት ነዉ ያየሁት» ሲሉ ስብሰባዉ፣ ሕዝቡ ለለዉጥ፣ ለሰላም፣ ለአገሩ አንድነትና ለነጻነቱ ያለዉን ቁርጠኝነት በግልጽ ያንጸባረቀበት ታላቅ ስብሰባ ነዉ ሲሉም አስተያየታቸዉ ገልጸዋል።

በሺሆች የሚቆጠሩ ኢትዮጵያዉያን በተገኙበት በዚሁ የመርካቶ የመድረኩ ስብሰባ፣ የአንድነት ፓርቲ ሊቀመንበር የሆነችዋ ወ/ት ብርቱካን ሚደቅሳ፣ በግፍና በጭካኔ በወያኔ/ኢሕአዴግ የታሰረችበትን አሥራ አራተኛ ወር የታሰበ ሲሆን፣ ሕዝቡም በዚህ አጋጣሚ ለወ/ት ብርቱካን ሚደቅሳ ያለዉን ክብርን ፍቅር በሚያስደንቅ ሁኔታ መግለጹን ከስፍራዉ የደረሰን ዘገባ ያመለክታል።

«የመድረኩ የምርጫ ምልክት የአምስት ጣቶች የሰላምታ ምልክት ሳይሆን የብርቱካን ምልክት መሆን ነበረበት፤ አንድነት/መድረኩ ይህ አይነት ስብሰባ ለማድረግ መዘግየት አልነበረበት፣ አይዟቹህ እኛ ከጎናቹህ ነን። መከፈል ያለበትን መስዋዕትነት ለመክፈል ተዘጋጅተናል …. » የሚሉ ጠንካራና ወኔ የሞላበት አስተያየቶች ይሰጡ የነበሩ ሲሆን፣ የአንድነት ፓርቲ አመራር አባላትም በሕዝቡ ስሜት እጅግ መበራታታቸዉና መደሰታቸዉን ከስፍራዉ የደረሰን ዘገባ ያመለክታል።

የወ/ት ብርቱካን ሚደቅሳ ስም ሲነሳ ሕዝቡ በጭብጨባና በፊጩት ስሜቱን ሲገልጽ የተመለከቱ ያነጋገርናቸዉ አንድ የፖለቲካ ተንታኝ፣ የመርካቶዉን ስብሰባ «አስደናቂ» ሲሉ ከገመቱትና ከጠበቁት በላይ እንደሆነ አስረድተዋል።

«ወያኔ የቅንጅት መሪዎችን ለሃያ ወራት ርካሽ በሆነ በዘር ማጥፋት ወንጀል አሰረ። ቅንጅትን አፈራረሰ። የቅንጅትን ስም ለአየለ ጫሚሶ ሰጠ። ብርቱካን ሚደቅሳ የሕዝብን አደራ ሳትበላ ፣ በዉጭ አገር የስደትንና የምቾትን ኑሮ አልፈልግም ብላ፣ መብቱ ከተረገጠዉ ሕዝብ ጋር አብሬ እታገላለሁ የሚል ዉሳኔ ወስና፣ በወያኔ ዱላ የተበታተነዉንና የፈረካከሰዉን ቅንጅት እንደገና አሰባስባ፣ በአንድነት ስም መንቀሳቀስ ጀመረች። ከቀድሞ ቅንጅት ክልል በማለፍ የቀድሞ ቅንጅት ያላቀፋቸዉን በብሄር ተደራጅተዉ የነበሩ ወገኖቻችንን በኢትዮጵያዊነት ጥላ ሥር ማሰለፍ ቻለች። መድረክ እንዲቋቋም ቁልፍ ሚና ተጫወተች። በዚህም ምክንያት ወያኔ የበቀልና የጭካኔ እርምጃ ወሰደባት።» ሲሉ ከዚህ በፊት የተደረጉትን ጥረቶችና የተከፈሉትን መስዋእተነት ያስታወሱት እኝሁ የፖለቲካ ተንታኝ « እንደዚያም ሆኖ ግን፣ ወያኔ እንደተመኘዉ አልሆነለትም። ሕዝብ ለነጻነቱ፣ ለመብቱና ለአንድነቱ ያለዉ ጥማትን የሚያመለክተዉ የቅንጅትን መንፈስ ሊያጠፋ አልቻለም። የቅንጅት ፓርቲዉን ሰርተፊኬት ሊወስድ፣ ስሙን ሰርዞ ለሌላ ሊሰጥ ይችላል። ነገር ግን መንፈሱን ግን ሊያጠፋ አይችልም። ብርቱካንን ሊያስር ይችላል። ብርቱካን የታሰረችለትን የነጻነትና የፍትህ እሳትን ግን ማዳፈንና ማሰር አይችልም። በመርካቶ የተደረገዉ ስብስባ ይሄንኑ ነዉ በገሃድ ያሳየዉ። » ሲሉም ወያኔ በጠመንጃና ገንዘብ አብላጫ ቢኖረዉም በሃሳብና በሕዝብ ድጋፍ ግን የተሸነፈ መሆኑን ያስረዱት።
የአንድነት ለዲሞክራሲና ለፍትህ ፓርቲ ዋና ጸሃፊ አቶ አንዱዋለም አርጌ በሚወዳደሩበት የሰሜን ማዘጋጃ አካባቢም ያለፈዉ ሳምንት እሁድ የካቲት 14 ቀን 2002 ዓ.ም ፣ በድል በር ትምህርት ቤት ተመሳሳይ ሕዝባዊ ስብሰባ የተደረገ መሆኑን በዚያ በርካታ ህዝብ ተገኝቶ ከመድረኩ አመራር አባላት ጋር መወያየቱ ይታወቃል።

በመርካቶና በሰሜን ማዘጋጃ የተደረጉት ሕዝባዊ ስብስባዎች በተከታታይ በሃያ ሶስቱም የአዲስ አበባ ወረዳዎች የሚደረጉ ሲሆን መድረኩም ለሚቀጥሉት አራት ወራት ህዝቡ ከፍርሃት ተላቆ ለመብቱ የሚነሳበት ጊዜ እንደሆነ በማሳሰብ የተጧጧፈ ቅስቀሳዎች የሚያደርግ እንደሆነም የመድረኩ አመራር አባላት ይጠቁማሉ።